មិនយូរទេ! «នៅឆ្នាំ២០២០ ចិននឹងបញ្ជូន​យានរុករក ទៅចុះចតលើ​ភពព្រះអង្គារ!» និងមានគំរោងទៅ​ព្រះច័ន្ទនានា​របស់​ភពព្រហស្បតិ៍!

0
Concept portrayal of China's Mars rover and lander released on August 23, 2016 by lunar probe and space project center of Chinese State Administration of Science, Technology and Industry for National Defence. China Daily/via REUTERS

(ប៉េកាំង)៖ ក្រុងអ្នកវិទ្យាសាស្រ្ត​របស់ចិន​កំពុងតែបំពេញការងារប្រកបដោយ​ឆន្ទៈខ្ពស់​ក្នុងការប្រកួត​ប្រជែង​ផ្នែកវិទ្យាសាស្រ្ត​ និងអវកាសនៅក្នុង​ទសវត្សរ៍ខាងមុខនេះ ដោយពួកគេ​មានគោលបំណង​បញ្ចូនយាន ទៅកាន់ផ្នែក​ងងឹតនៃព្រះច័ន្ទ​នៅក្នុង​ឆ្នាំ២០១៨ បន្ទាប់មក​នឹងធ្វើដំណើរ​ទៅកាន់ភពអង្គារ​ឲ្យបានមុន​ចុង​ទសវត្សរ៍ឆ្នាំ២០២០។ នេះបើយោង​តាមប្រភព​ព័ត៌មាន​អាមេរិក CNN ចេញផ្សាយ​នៅព្រឹកថ្ងៃចន្ទ ទី២៧ ខែកុម្ភៈ ឆ្នាំ ២០១៧។

កាលពីប៉ុន្មាន​ថ្ងៃថ្មីៗនេះទីភ្នាក់ងារអវកាស​របស់ចិន បានធ្វើសន្និសីទកាសែតដ៏ធំមួយ ដើម្បី​ផ្សព្វផ្សាយ​នូវគោលការណ៍​ដ៏សំខាន់ៗ ព្រមទាំង​មហច្ឆិតាដ៏មហិមា​របស់រាជរដ្ឋាភិបាល​ក្នុងការសិក្សា​ស្រាវជ្រាវ​អំពីលំហអាកាស​ឲ្យកាន់តែស៊ីជម្រៅ​បន្ថែមទៀត។ លោក Wu Yanhua នាយរង​រដ្ឋបាល​អវកាសជាតិ បាននិយាយ​ថា ចិនមាន​គោលបំណង​បង្ហោះយាន​អង្កេត​ភពអង្គារ​ដំបូងគេបង្អស់​របស់ពួកគេ​នៅក្នុងអំឡុង​ទសវត្សរ៍​ឆ្នាំ២០២០ ដើម្បីធ្វើការ​សិក្សា​ស្រាវជ្រាវ ព្រមទាំង​ប្រមូលភស្តុតាង​ផ្សេងៗ​ដែលមាននៅលើ​ភពក្រហម​នេះ សម្រាប់ក្រុម​អ្នកវិទ្យាសាស្រ្ត ធ្វើការ​ពិនិត្យ និងវិនិច្ឆ័យ។

ម្យ៉ាងវិញទៀត​លោក Wu Yanhua បានបន្តទៀតថា​ក្រៅពី​ទៅសិក្សាស្រាវជ្រាវ​អំពីភពអង្គារ ចិននឹង​បញ្ចូនយាន​ទៅរុករក និងធ្វើការ​អង្កេតអំពី​ភពផ្សេងៗ​ទៀត ដែលនៅក្នុង​នោះរួមមាន​ភពព្រហស្បតិ៍ និងព្រះច័ន្ទ​របស់វាជាដើម។

ជាមួយគ្នា​នេះដែរ លោក Wu Yanhua បានបញ្ជាក់ថា «ឆន្ទៈដ៏ធំបំផុត​នៅក្នុងបេសកកម្ម​ខាងមុខនេះ គឺ ដើម្បីឲ្យ​ចិនក្លាយជា​ភ្នាក់ងារអវកាស​សំខាន់​ និងប្រកបដោយសក្តានុពល​មួយ​នៃពិភពលោក។»

គួរបញ្ជាក់ថាប្រទេស​ដែលមានយានចុះចត និងផ្កាយរណបស្រាវជ្រាវច្រើន​ជាងគេនៅភពអង្គារ នោះគឺ​សហរដ្ឋអាមេរិក ហើយសហគមន៍​អឺរ៉ុបក៏ទើបតែ​បានហែកប្រាក់ ១ពាន់លានដុល្លារចោល ដោយសារតែ​ការផ្ទុះឆេះយានរុករកមួយ​កាលពីឆ្នាំមុននៅលើ​ភពអង្គារផងដែរ។ ក្រៅពីនេះ​ប្រទេសឥណ្ឌា​បានសម្រេច​ជោគជ័យរួចទៅហើយ​ក្នុងការបញ្ជូនផ្កាយរណប​ទៅថតរូបភាព និងបកស្រាយ​អាថ៌កំបាំង​នៅភពអង្គារ ខណៈប្រទេស អេមីរ៉ាត់ អារ៉ាប់រួម មានគំរោង​យក្សនៅ១០០ឆ្នាំទៀត គឺកសាងទីក្រុង​លើភពក្រហមនោះ៕

ចែករំលែក