ផែនដី​ថយ​ល្បឿន​វិល! «រយៈពេល ២០០លាន​ឆ្នាំ​ទៀត មួយថ្ងៃ​លើ​ផែនដី​នឹង​កើន​ដល់ ២៥ម៉ោង» ដោយសារតែ…

0

(អាមេរិក)៖ នាឡិកា​នា​ថ្ងៃ​ខាងមុខ នឹង​ហួស​សម័យ​ប្រើការ​លែងកើត​ទៀតហើយ ពីព្រោះ​បច្ចុប្បន្ននេះ ភពផែនដី​របស់​យើង កំពុង​វិល​ជុំវិញខ្លួន​ឯង​កាន់តែ​យឺតទៅៗហើយ ដោយសារ​នាពេល​អនាគត ក្នុង​មួយថ្ងៃ​យើង​នឹងមាន​ពេលវេលា​ដល់ ២៥ម៉ោង។ នេះ​បើតាម​ការដកស្រង់​ការផ្សាយ​ចេញពី​សារព័ត៌មាន Express UK នៅ​ល្ងាច​ថ្ងៃ​ចន្ទ ទី២៨ ខែសីហា ឆ្នាំ២០១។

ទោះបីជា​បែបនេះ​ក្តី ក្រុម​អ្នកវិទ្យាសាស្ត្រ​បានផ្តល់​ការណែនាំ​ថា កុំ​ទាន់​អាល់​មាន​ក្តី​ព្រួយបារម្ភ ឬក៏​ប្រមែ​ប្រមូលយក​នាឡិកា​របស់​អ្នក​ទៅ​បោះចោល​ថ្វី ដោយសារតែ​ពេលវេលា​ដែល​យើង​មាន​ក្នុង​ថ្ងៃ នឹងមិន​កើន​ដល់ ២៥ម៉ោង​នោះឡើយ រហូត​ទាល់តែ​ប្រមាណ​ជា ២០០លាន​ឆ្នាំ​ទៀត​ឯណោះ។ ដោយសារតែ​ក្នុង​មួយថ្ងៃ កំពុងតែ​កើន​ពេលវេលា​ត្រឹមតែ ០២មី​លី​វិនាទី (១មី​លី​វិនាទី = ០.០០១វិនាទី) ប៉ុណ្ណោះ ជា​រៀងរាល់ ១០០ឆ្នាំ​ម្តងនោះ ដើម្បី​ឲ្យ​កើន​បាន​មួយ​នាទី វា​នឹងត្រូវ​ចំណាយពេល​ដល់​ទៅ ៦.៧លាន​ឆ្នាំ​ទៀត។

គួរ​បញ្ជាក់ថា ក្រុម​អ្នកស្រាវជ្រាវ​បាន​ប្រើប្រាស់​កំណត់ត្រា​ប្រវត្តិសាស្ត្រ​នានា ស្តីពី​បាតុភូត​សូរ្យគ្រាស-ច័ន្ទ​គ្រាស រួមទាំង​ព្រឹត្តិការណ៍​តារាសាស្ត្រ​ដ៏ទៃៗទៀត គិត​ចាប់តាំងពី​ឆ្នាំ៧២០មុន​គ្រិស្តសក្ករាជ រហូតដល់​ឆ្នាំ២០១៥ ដើម្បី​ការព្យាករណ៍​អំពី​ការកើនឡើង​នៃ​ម៉ោង​ក្នុង​មួយថ្ងៃ នៅក្នុង​ការសិក្សា​ស្រាវជ្រាវ​របស់​ពួកគេ។

សម្រាប់​រយៈពេល ២០០លាន​ឆ្នាំ​ទៀត​នេះ គេ​នៅ​មិនអាច​គណនា​ដឹងផង​ថា ផែនដី​នឹង​អាចមាន​វត្តមាន​មនុស្ស​ទៀត​ដែរ ឬក៏​អត់​នោះ ក៏​ព្រោះតែ​បច្ចុប្បន្ននេះ មហន្តរាយ​ជាច្រើន​ដែល​គំរាមកំហែង​ជីវិត​មនុស្ស កំពុងតែបន្ត​កើនឡើង​យ៉ាងខ្លាំង ហើយ​នៅត្រឹមតែ​រាប់រយឆ្នាំ​ទៀត​ប៉ុណ្ណោះ មនុស្ស​នឹង​កាន់តែ​ពិបាក​រស់​នៅលើ​ផែនដី​នេះ៕

ចែករំលែក