ទៀតហើយ! មកតាមដាន «​ដំណឹងល្អ និងដំណឹង​អាក្រក់» អំពីកែវយឺត​អវកាស James Webb…

0

(អាមេរិក)៖ នៅពេលបញ្ជូន​ទៅកាន់​ទីអវកាស កែវយឺត James Webb នឹងក្លាយជា​កែវយឺតអវកាស​​ទំនើប និងមានខ្លាំងជាងគេ​បង្អស់​ហើយ ​ក្នុងនាមជាកែវយឺតជំនាន់ក្រោយ បន្តពី​កែវយឺត Hubble, Spitzer, និង Kepler James Webb នឹងប្រើប្រាស់​ឈុតឧបករណ៍​ទំនើបៗរបស់វា​ធ្វើ​ការសិក្សាស្រាវជ្រាវ​ទៅលើអំឡុងពេលដំបូងៗ​ នៃការកកើតចក្រវាឡ, ទៅលើប្រព័ន្ធ​ព្រះអាទិត្យ, និងជួយចាត់ថ្នាក់ភព​អេលៀន​នៅក្រៅ​​​ប្រព័ន្ធព្រះអាទិត្យ​ជាដើម។

ប៉ុន្តែអ្វីដែល​សំខាន់នោះគឺថា កែវយឺតអវកាស James Webb បានឆ្លងកាត់ការ​ពន្យារពេលជាច្រើនលើក​ច្រើនសា ហើយនាពេលនេះកាល​បរិច្ឆេទនៃការ​ចេញបេសកកម្ម​ដ៏នេះ ត្រូវបានលើកទៅដល់​ប៉ុន្មានឆ្នាំខាងមុខទៀតឯណោះ ប៉ុន្តែវាក៏អាចចាត់ទុកថា ជាដំណឹងល្អមួយដែរ​ ដែលគម្រោង​អភិវឌ្ឍន៍កែវយឺតអវកាស​ ប្រកបដោយ​មហិច្ឆតានេះ នៅតែមិនត្រូវ​បានបោះ​បង់ចោល ទោះបីជាមានឧបសគ្គ​ច្រើនបែប​ណា​ក្តី​។

នាពេលថ្មីៗនេះ ក្រោយការវិភាគ និងវាយតម្លៃទៅលើវឌ្ឍនភាព​នៃគម្រោង James Webb ទីភ្នាក់ងារ​អវកាស NASA បានសម្រេច​ជាថា ការងារ​ទៅលើកែវយឺតវកាស​នេះ គួរតែបន្ត​ទៅមុខ ប៉ុន្តែកាលបរិច្ឆេទ​នៃការបាញ់បង្ហោះ​របស់វា ត្រូវបានលើក​ទៅថ្ងៃទី៣០ ខែមិនា ឆ្នាំ២០២១។​ ការពន្យារពេល​សាជាថ្មីម្តង​ទៀតនេះ ត្រូវបាន​អង្គការ NASA អះអាងថា បណ្តាលមក​ពីកត្តា​ជាច្រើន រួមមានបញ្ហា​ប្រឈមផ្នែក​បច្ចេកទេស​ ​ព្រមទាំងកិច្ចការ​ផ្សេងៗ ដែលត្រូវ​ដោះស្រាយ មុនពេលបេសកកម្ម​អាច​ចាប់ផ្តើម​បានជាដើម។

គួរជម្រាបថា កាលបរិច្ឆេទ​ដំបូងបំផុតដែល NASA ប្រុងនឹងបាញ់បង្ហោះ​កែវយឺត James Webb ឡើងទៅកាន់​ទីអវកាស គឺនៅ​ខែតុលា ឆ្នាំ២០១៨ ប៉ុន្តែក្រោយមក​ត្រូវបានលើកទៅ​អំឡុងដើមឆ្នាំ២០១៩ រួចហើយក៏ពន្យារទៅដល់ខែឧសភា ឆ្នាំ២០២០ និងចុងក្រោយ​បំផុតនេះ​​ គឺនៅចុងខែមីនា ឆ្នាំ២០២១។

ចំណុចសំខាន់៖ កែវយឺតអវកាស James Webb ត្រូវបាន​បង្កើតឡើង​ដោយអង្គការ NASA សហការ​ជាមួយនឹង​ទីភ្នាក់ងារអវកាស​អឺរ៉ុប ESA នៅក្នុងគំរោង​ផលិតវាចេញមក ដោយប្រើប្រាស់​រយៈពេល ០៥ឆ្នាំ និងគ្រោងបំពេញ​ប្រតិបត្តិការ​នៅទីអវកាស ក្នុងរយៈពេល ១០ឆ្នាំ។ សម្រាប់ស្ថានភាព​ទូទៅវិញ គឺ James Webb មានទម្ងន់ ៦.៥តោន និងទំហំ ២០ម៉ែត្រ គុណនឹង ១៤ម៉ែត្រ។

គោលដៅធំៗរបស់ James Webb គឺវានឹងធ្វើការ​អង្កេត​វត្ថុនានា​នៅក្នុងចក្រវាឡដូចជាផ្កាយ ភព និងសូពើណូវ៉ា ជាពិសេសនោះគឺការកកើតឡើងនៃ​កាឡាក់ស៊ី​នានា កាលពីពេលដំបូងៗក្រោយ​បន្ទុះប៊ីកប៊ែង (Big Bank)។ បន្ថែម​ពីនេះ​ទៀត ឧបករណ៍​ពហុវិស័យនៅលើ James Webb នឹងធ្វើការ​ចាប់យក ព្រមទាំងសិក្សា​អំពីការចាប់​កំណើតនៃផ្កាយ និងភពនានា ហើយជា​ពិសេសនោះ គឺវានឹង​ធ្វើការថតរូប​ដោយផ្ទាល់​ចំពោះ​ភពអេលៀន (ពពួក Exoplanets) និងសូពើណូវ៉ាផងដែរ។

ឆ្នាំ២០២១ ខាងមុខនេះ កែវយឺត​អវកាស​ James Webb នឹងត្រូវដង្ហែក្បួន​ដ៏ធំមហិមាមិន​ធ្លាប់មាន ឡើងទៅកាន់​ទីអវកាស ដើម្បីជួយជ្រោមជ្រែង​រាមច្បងរបស់ នោះគឺ Kepler។ និយាយឲ្យ​ចំទៅ Kepler ដើរតួជាអ្នករក​មើលភព និងស្វែងយល់លក្ខណៈ​នៃគន្លងភពនោះ គោចរជុំវិញ​ផ្កាយរបស់វា ហើយបន្ទាប់​មកទៀត James Webb ក៏មានតួនាទី​គណនាថា តើភពដែល​អាចមាន​ជីវិត​​នោះ ផ្សំឡើងពី​បរិយាកាស​អ្វី (មានសារធាតុ ឬឧស្ម័នអ្វីខ្លះ នៅក្នុង​បរិយាកាស​របស់វា)។

គួរបញ្ជាក់ថា ​ការយល់ដឹងបរិយាកាស​​ខាងក្រៅនៃភពមួយ ពិតជាសំខាន់​​ខ្លាំងណាស់ ព្រោះថាវា នឹងអាចបញ្ជាក់ឲ្យ​​យើងដឹងថា ភពនោះអាច​មាន​ជីវិតរស់នៅ ឬអត់ ឬមួយក៏អាច​​និយាយថា វាស្វាគមន៍​ជីវិតដែរ ឬអត់។ ឧទាហរណ៍ថា ភពមួយ​ត្រូវបាន​ James Webb អង្កេតដឹងថា មានឧស្ម័នគ្របដណ្តប់​ក្នុងបរិយាកាស​ស្រដៀងនឹងផែនដី ដូចជាមាន​អាសូត អុកស៊ីសែន ឬកាបូនឌីអុកស៊ីត និងកំហាប់បរិយាកាស​ប្រហែលគ្នានោះ ក្រុមអ្នកវិទ្យាសាស្ត្រ​ប្រាកដជាអាចសន្និដ្ឋានបានថា ភពនោះមានជីវិតឬទេ៕

ចែករំលែក