ក្នុងចំណោម​ប្រទេសអាស៊ាន​ទាំង ១០ តើប្រជាជន​​អាមេរិកស្គាល់​​ប្រទេស​ណា​​ខ្លាំងជាងគេ?

0

 

(បរទេស)៖ វាពិតជាពិបាក​នៅក្នុងការគណនាដឹងណាស់ ចំពោះប្រទេស​ណាខ្លះក្នុង​តំបន់​អាស៊ាន ដែលប្រជាជនអាមេរិក​ស្គាល់ច្បាស់ជាងគេ ខណៈសហរដ្ឋអាមេរិក​ពិតជា​ធំធេង និងមានចំរុះជាតិសាសន៍​​បំផុត​ក្នុងលោករហូត​​ដល់ទៅជាង ៣២៥លាននាក់។ នេះបើតាម​ការចេញផ្សាយដោយ​វែបសាយសំនួរ-ចម្លើយ Quora ដែលត្រូវបាន​ដកស្រង់​នៅ​ល្ងាច​​ថ្ងៃពុធ ទី០៥ ខែកញ្ញា ឆ្នាំ២០១៨។

ប្រទេស​អាស៊ានទាំង ១០ មានដូចជា ឥណ្ឌូណេស៊ី, មីយ៉ាន់ម៉ា, ថៃ, ម៉ាឡេស៊ី, វៀតណាម, ហ្វីលីពីន, ឡាវ, កម្ពុជា, ប្រ៊ុយណេ និងសិង្ហបុរី ដែលសុទ្ធសឹងតែអាច​និយាយបានថា ធ្លាប់មានប្រវត្តិសាស្ត្រ​ទាំងជូរចត់ និងល្អៗជា​មួយសហរដ្ឋអាមេរិក ប៉ុន្តែសម័យកាល​នៃការអភិវឌ្ឍយ៉ាងសកម្មក្នុង​សតវត្សរ៍ទី ២១ នេះ ការយល់ដឹង និងចាប់អារម្មណ៍​​របស់ប្រជាជន​អាមេរិក គឺមានចំរុះ និងប្លែកៗជាងកាល​ពីអតីតកាល។

តាម​ស្ទាបស្ទង់របស់ Quora ទៅលើមតិមួយចំនួន​របស់ប្រជាជន​អាមេរិក ភាគច្រើន​នៃពួកគេមិនសូវដឹងច្បាស់លាស់ពីតំបន់អាស៊ីអាគ្នេយ៍ ឬអាស៊ាននោះ​ឡើយ ហើយមួយ​ចំនួនតូចទៀត មិនដឹងថាតំបន់​អាស៊ីអាគ្នេយ៍ស្ថិតនៅទីណា​នៃភពផែនដី​ផង។ ប៉ុន្តែដោយ​យោងតាម​មតិភាគច្រើន ប្រទេស​ដែលប្រជាជនអាមេរិក​ស្គាល់ច្រើនជាងគេ នោះគឺ «សិង្ហបុរី» ដោយសារតែ​ប្រទេសនេះ​មានភាពល្បីល្បាញ​ខាងវិស័យទេសចរណ៍, សេដ្ឋកិច្ចរីកលូតលាស់ខ្លាំងក្លា​ជាងគេក្នុងតំបន់ និងមានទំនាក់​ទំនង​យ៉ាងប្រសើរ​ជាមួយ​សហរដ្ឋអាមេរិក​ផងដែរ។

សម្រាប់ប្រទេស​​ទីពីរដែលប្រជាជនអាមេរិក​​ស្គាល់ច្រើនផងដែរនោះ គឺប្រទេស «វៀតណាម» ព្រោះប្រជាជាតិ​មួយនេះ​ធ្លាប់​មានជម្លោះ​ យ៉ាង​ជូរចត់​ជាមួយ​សហរដ្ឋអាមេរិក កាលពីសម័យ​សង្គ្រាម​វៀតណាម ដែលសហរដ្ឋអាមេរិក​​មិនបានទទួល​ជ័យជម្នះ​នោះ​​ឡើយនៅឆ្នាំ១៩៧៥។ រឿងរ៉ាវ​​ប្រវត្តិសាស្ត្រ-សង្គ្រាម​រវាង​ប្រទេសទាំងពីរ មិនត្រឹមតែ​​ល្បីល្បាញក្នុង​កម្មវិធីសិក្សា រវាងប្រទេស​ទាំងពីរ​នេះ​ប៉ុណ្ណោះទេ ប៉ុន្តែអ្នកសិក្សា​​នានា​​នៅទូទាំងពិភពលោក ក៏មិនដែល​រំលង​​ក្នុង​ការ​ស្រាវជ្រាវ​សម្រាប់កម្ម​វិធីសិក្សាប្រវត្តិសាស្ត្រ​របស់ពួកគេ​នោះដែរ។

ជាចុងក្រោយ​គឺប្រទេសអាស៊ានទីបី ដែលប្រជាជនអាមេរិក​ស្គាល់ខ្លាំង​ផងដែរនោះ គឺប្រទេស «ថៃ» ដែលជាប្រទេស​ល្បីល្បាញខាង​ធ្វើរដ្ឋប្រហារ និងវិស័យទេសចរណ៍​ប្រកបដោយស្នាមញញឹម ទាក់ទាញគ្រប់ជាតិសាស្ត្រតែម្តង ដែលបាន​ទទួលភ្ញៀវបរទេស​ជាង ៣៥លាននាក់ កាលពី​ឆ្នាំ២០១៧។ ប្រទេសថៃពីមុន​ក៏ជាសម្ព័ន្ធមិត្ត​យ៉ាងជិត​ស្និទ្ធបំផុត របស់សហរដ្ឋអាមេរិកផងដែរ ប៉ុន្តែដោយសារ​រដ្ឋប្រហារ​ឆ្នាំ២០១៤ អ្វីៗហាក់​មានការប្រែប្រួល និងរកាំ​រកូសខ្លាំង៕

ចែករំលែក