ព្រៃ Amazon ដែលជា «សួតនៃភពផែនដី» កំពុងឆាបឆេះយ៉ាងធ្ងន់ធ្ងរបំផុត, ប្រេស៊ីលតវ៉ាចំពោះការរិះគន់ពីបរទេស និងក្នុងប្រទេស

0

(ប្រេស៊ីល)៖ ខណៈអន្តរជាតិនាំគ្នារិះគន់បញ្ហាភ្លើងឆេះព្រៃក្នុងតំបន់អាម៉ាហ្សូន ប្រធានាធិបតីប្រេស៊ីលលោក ហ្ស៊ែរ បូលសូណារ៉ូ (Jair Bolsonaro) បានទទួលស្គាល់ថា ក្រុមកសិករមួយចំនួនអាចជាអ្នកបង្កឱ្យមានភ្លើងឆេះ នៅក្នុងតំបន់ព្រៃទាក់ទាញទឹកភ្លៀង​ដ៏ធំបំផុតមួយនៅលើពិភពលោកមួយនេះ។ ប៉ុន្តែព្រមពេលជាមួយគ្នា លោកបានប្រាប់កុំឱ្យបរទេសលូកដៃចូលរឿងនេះឱ្យសោះ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃសុក្រ ទី២៣ ខែសីហា ឆ្នាំ២០១៩។

ប្រតិកម្មរបស់លោក Jair Bolsonaro ធ្វើឡើងនៅថ្ងៃព្រហស្បតិ៍សប្ដាហ៍នេះ ក្នុងវីដេអូមួយផ្សាយបន្តផ្ទាល់លើ Facebook បន្ទាប់ពីប្រធានាធិបតីបារាំងលោក អែមម៉ានុយអែល ម៉ាក្រុង និងអគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គួទែរែស (António Guterres) បានបង្ហាញក្ដីព្រួយបារម្ភ និងរិះគន់ចំពោះបញ្ហាភ្លើងឆេះព្រៃក្នុងតំបន់អាម៉ាហ្សូន ដោយចាត់ទុកថាវាគឺ «វិបត្តិមួយសម្រាប់អន្តរជាតិទាំងមូល»។

លោក Bolsonaro បានលើកឡើងដូច្នេះថា «ប្រទេសមួយចំនួនផ្ញើលុយមកកាន់ទីនេះ មិនមែនដើម្បីបុព្វហេតុមនុស្សធម៌ឡើយ… ប៉ុន្តែពួកគេផ្ញើលុយមកកាន់ទីនេះ ដើម្បីលូកដៃចូលកិច្ចការផ្ទៃក្នុងរបស់យើងតែប៉ុណ្ណោះ ហើយខ្ញុំក៏ចង់សួរអ្នកទាំងអស់គ្នាដែរថា បើសិនជាអ្នកវិញតើអ្នកនឹងដោះស្រាយ បញ្ហាភ្លើងឆេះព្រៃនេះដូចម្ដេច? ខណៈអ្នកដឹងហើយថា អាម៉ាហ្សូន មានទំហំធំជាងអឺរ៉ុបទៅទៀត»។

គួរបញ្ជាក់ថា បើតាមវិទ្យាស្ថានជាតិសម្រាប់ការសិក្សាស្រាវជ្រាវទីអវកាស (INPE) មានភ្លើងឆេះព្រៃរហូតដល់ទៅ ៧២,៨៤៣ កន្លែង បានកើតឡើងក្នុងប្រទេសប្រេស៊ីលក្នុងឆ្នាំ២០១៩ នេះហើយក្នុងចំណោមនោះ ច្រើនជាងពាក់កណ្ដាល គឺកើតឡើងនៅក្នុងតំបន់ព្រៃអាម៉ាហ្សូន។ អាត្រានេះបានកើនឡើងជាង ៨៣ភាគរយឯណោះ បើធៀបទៅនឹងរយៈពេលដូចគ្នាកាលពីឆ្នាំ២០១៨។

ដោយឡែក ក្រុមអង្គការសង្គមស៊ីវិលផ្នែកការពារបរិស្ថាននៅក្នុងប្រទេសប្រេស៊ីល បានទម្លាក់ការទទួលខុសត្រូវនៃបញ្ហាភ្លើងឆេះព្រៃ ទៅលើប្រធានាធិបតីប្រេស៊ីល លោក Jair Bolsonaro ដោយចោទថា លោកមានភាពធូររលង់ក្នុងការគ្រប់គ្រងព្រៃឈើ ហើយទាំងលើកទឹកចិត្តឱ្យមានការកាប់បំផ្លាញព្រៃទៀតផង តាមរយៈគំរោងបើកដៃធ្វើអាជីកម្មក្នុងតំបន់ព្រៃអាម៉ាហ្សូន។

ប៉ុន្តែលោក Bolsonaro បានចោទប្រកាន់បកវិញថា ភ្លើងឆេះព្រៃនៅក្នុងតំបន់អាម៉ាហ្សូន អាចបណ្ដាលមកពីក្រុមអង្គការសង្គមស៊ីវិលការពារបរិស្ថាន គឺជាអ្នកដុតដោយចេតនា ដើម្បីឱ្យអន្តរជាតិរិះគន់រដ្ឋាភិបាលរបស់លោក។
លើសពីនេះទៅទៀត ប្រធានាធិបតីប្រេស៊ីលរូបនេះក៏បានបណ្ដេញនាយកវិទ្យាស្ថាន INPE ចេញពីតំណែងផងដែរ បន្ទាប់ពីចុះផ្សាយរបាយការណ៍ថា ការកាប់បំផ្លាញព្រៃឈើនៅតំបន់អាម៉ាហ្សូនមានអាត្រាដល់ទៅ ៨៨ភាគរយក្នុងខែមិថុនាកន្លងទៅ ដែលលោក Bolsonaro ផ្ទាល់អះអាងថា ជារបាយការណ៍កុហក។

ព្រៃអាម៉ាហ្សូនត្រូវបានគេចាត់ទុកថា «សួតរបស់ផែនដី» ដោយវាផលិតខ្យល់អុកស៊ីហ្សែន ២០ភាគរយ នៅក្នុងបរិយាកាសផែនដីទាំងមូល និងជាព្រៃទាក់ទាញទឹកភ្លៀងដ៏សំខាន់មួយ​នៅលើពិភពលោក។ ដូច្នេះហើយ ទើបក្រុមអ្នកវិទ្យាសាស្ត្រជាច្រើន ព្រួយបារម្ភជាខ្លាំងចំពោះបញ្ហាភ្លើងឆេះព្រៃ និងការកាប់បំផ្លាញព្រៃឈើអាម៉ាហ្សូន ដ្បិតវាអាចនឹងបំផ្លាញដល់កិច្ចខិតខំប្រឹងប្រែងប្រយុទ្ធ ប្រឆាំងនឹងការឡើងកម្ដៅផែនដី៕

ចែករំលែក