ព្រឹត្តិការណ៍លើ​មេឃក្នុង​យប់នេះ! ភពព្រហស្បតិ៍ ភពសុក្រ និងព្រះច័ន្ទ បង្ហាញខ្លួន​ព្រមៗគ្នាតែម្តង!

0

 

(អាមេរិក)៖ ពិតជាព្រឹត្តិការណ៍​ដ៏កម្រមួយទៀតហើយ ដែលនឹងកើតមាន​ឡើង​នៅយប់ថ្ងៃ​ព្រហស្បតិ៍នេះ ដោយភពសុក្រ និងព្រហស្បតិ៍ នឹងបង្ហាញខ្លួននៅ​លើផ្ទៃមេឃ អមដោយ​ព្រះច័ន្ទមួយ​ចំនិតតែម្តង ដោយភពព្រហស្បតិ៍​មានពន្លឺពណ៌ស និងភ្លឺល្មមស្ថិតនៅខាងឆ្វេង​របស់ទីតាំងព្រះច័ន្ទ ខណៈភពសុក្រវិញ​មានពណ៌ស និងភ្លឺជាងភពព្រហស្បតិ៍​​ស្ថិតនៅឆ្ងាយ​ខាងស្តាំឆ្ងាយពីព្រះច័ន្ទបន្តិច។ នេះបើតាម​ការ​ចេញផ្សាយដោយ Space នាល្ងាច​ថ្ងៃព្រហស្បតិ៍ ទី១៦ ខែសីហា ឆ្នាំ២០១៨។

ព្រឹត្តិការណ៍​ខាងលើនេះ បានកើតមានឡើងមួយយប់រួច​ទៅហើយ ដោយកាលពី​យប់ថ្ងៃ​ពុធ ទី១៥ ខែសីហានោះ ក៏មានស្ថានភាពមិនខុសពីគ្នា​ប៉ុន្មាននោះដែរ។ ពន្លឺរបស់​ភពព្រហស្បតិ៍ និងភពសុក្រ​ងាយចំណាំនោះទេ ដោយវាមាន​សភាពភ្លឺ និងមានលំនឹង មិនភ្លឹបភ្លែតៗ ដូចជាពន្លឺផ្កាយ​ផ្សេងៗទៀតនោះ​ឡើយ។ សម្រាប់ពេល​វេលាដែលអាច​​ឲ្យយើង​ឃើញព្រឹត្តិការណ៍​នេះ គឺនៅចន្លោះ​ម៉ោង ៨៖៣០យប់ ដល់ម៉ោង ១០៖០០នាទីយប់។

គួរបញ្ជាក់ថា លោកអ្នកមិន​ចាំបាច់មានតេឡេស្កូប​អ្វីនោះឡើយ ដើម្បីបាន​ឃើញទិដ្ឋភាព​ខាងលើនេះ ដោយគ្រាន់តែ​ប្រើ​ភ្នែកមួយគូរបស់អ្នក​គឺគ្រប់គ្រាន់។ ប៉ុន្តែប្រសិន​បើចង់ឲ្យ​បាតុភូតយប់នេះ​កាន់តែច្បាស់​នោះ លោកអ្នកអាចមានតេឡេស្កូប ឬកែវយឺត​ល្មមៗមួយ​ក៏កាន់តែប្រសើរផងដែរ ដើម្បីងាយស្វែងរក​ទិសនៃភពនីមួយៗ​ដូចបានជម្រាប​ជូនខាងលើនេះ។ សម្រាប់ព្រឹត្តិការណ៍​ទាំងមូល អាចទស្សនា​បានពេញភ្នែក​នៅពេលមេឃ​ស្រឡះល្អ ដោយគ្មានពពក​តែប៉ុណ្ណោះ៕

ចែករំលែក