ទីបំផុតយាន Voyager 2 ជិតទម្លុះសំណាញ់​នៃប្រព័ន្ធ​ព្រះអាទិត្យ ចូលទៅកាន់​តំបន់ Interstellar Space ហើយ!

0

 

(អាមេរិក)៖ ថ្មីៗនេះយាន Voyager 2 របស់អង្គការ NASA បានផ្តល់​ដំណឹងមកថា វាបាន​ហោះទៅជិតដល់ច្រកឆ្លងចេញពីប្រព័ន្ធព្រះអាទិត្យ ដើម្បីចូលទៅ​កាន់តំបន់ Interstellar Space ហើយ បន្ទាប់ពីការបាញ់​បង្ហោះកាលពីឆ្នាំ១៩៧៧ និងបានធ្វើការសិក្សាអ្វីៗ​ជាច្រើន​អំពីភព​នានា និងលក្ខណៈជារួម​នៅក្នុងប្រព័ន្ធព្រះអាទិត្យ​យើងនេះ។ នេះបើតាមការចេញ​ផ្សាយដោយ​វែបសាយផ្លូវការរបស់អង្គការ NASA នាថ្ងៃអាទិត្យ ទី០៧ ខែតុលា ឆ្នាំ២០១៨។

នៅក្នុងដំណើរដែល​ជិតនឹងផុតពីប្រព័ន្ធព្រះអាទិត្យនេះ យានអវកាស Voyager 2 ក៏បាន​ទទួលចំហាយនៃកម្មរស្មី Cosmic Rays ដែលជះមកពីតំបន់​ក្រៅប្រព័ន្ធព្រះអាទិត្យកាន់តែ​កើនឡើងផងដែរ ខណៈប្រព័ន្ធព្រះអាទិត្យ​​មានស្រទាប់ដ៏ធំព័ទ្ធជុំវិញមានឈ្មោះថា Heliosphere ដើម្បីការពារកម្មរស្មី​អាក្រក់ៗពីកាឡាក់ស៊ី មិនឲ្យជ្រៀតចូលមកក្នុង​ប្រព័ន្ធទាំងមូលនោះឡើយ ហើយក៏មិនសូវខុស​ពី​ដែនម៉ាញេទិច​ផែនដី ដែលតែងការពារជីវិត​​សត្វលោក ពីរលកវិទ្យុសកម្ម​ជះចេញពីព្រះអាទិត្យ​នោះដែរ។

កាលពីឆ្នាំ២០០៧ យាន​អវកាស Voyager 2 បានធ្វើដំណើរសំដៅ​ទៅ​ស្រទាប់ជាយបំផុតនៃ Heliosphere ទៅហើយ ដោយឆាប់ៗខាងមុខនេះ​ វានឹងក្លាយជាគ្រឿង​យន្តទីពីរបង្កើតឡើង​ដោយមនុស្ស ដែលអាចទម្លុះ​សំណាញ់នៃប្រព័ន្ធព្រះអាទិត្យ ហើយចូលទៅ​ក្នុងតំបន់ទីអវកាស​ទំនេរ ឬទីអវកាសសាធារណៈដែលគេហៅថា Interstellar Space ជាមិនខាន ខណៈដែល​បច្ចុបន្ននេះវាកំពុង​តែស្ថិតនៅក្នុង ១៧.៧ពាន់លានគីឡូម៉ែត្រ​ពីភពផែនដី ឬស្មើនឹង ១១៨ដង នៃចម្ងាយរវាងផែនដី និងព្រះអាទិត្យ (១៥០លានគីឡូម៉ែត្រ = 1AU)។

គួរបញ្ជាក់ថា កាលពីចុង​ខែសីហាយាន Voyager 2 បានចាប់រលក​កម្មរស្មី Cosmic Rays កើនឡើងរហូតដល់ ៥% បើធៀបនឹងអ្វីដែល​វាចាប់បាន កាលពីអំឡុង​ដើមខែសីហា ហើយកាលពីអំឡុង​ខែឧសភា ឆ្នាំ២០១២ យានអវកាស Voyager 1 ក៏បានជួប​ប្រទះ​បទពិសោធន៍​ស្រដៀងគ្នានេះដែរ។ ពន្លឺ ឬរលកកម្ម​រស្មី Comsic Rays គឺភាគល្អិត​នៃម៉ូលេគុល​ពន្លឺដែលចល័ត​លឿនបំផុត មកពីក្រៅប្រព័ន្ធ​ព្រះអាទិត្យ ហើយមួយចំនួន​នៃពួកវាត្រូវ​បាន​រារាំង​ដោយ​ស្រទាប់ Helisophere នៃប្រព័ន្ធ​ព្រះអាទិត្យ។

បើតាមក្រុមការងារ​គ្រប់គ្រង Voyager 2 បានសង្កត់ធ្ងន់ថា យាននេះអាច​នឹងទៅទម្លាយ​ចេញ​ពីរណាំង Heliopause ចេញក្រៅ​តំបន់ Heliosphere ជាផ្លូវការក្នុង​រយៈពេល ៦ឆ្នាំលឿន​ជាងយាន Voyager 1 ធ្លាប់បានធ្វើ ព្រោះវាឥទ្ធិពល​នៃរវិលជុំ​ព្រះអាទិត្យនៅ​អំឡុង​ពេល ១១ឆ្នាំ នៃការប្រែប្រួលផ្ទៃស្រទាប់លើ​នៃព្រះអាទិត្យ​ដ៏ពុះកញ្ជ្រោល ដែលជាការ​ជះចេញនៃ​ភាគល្អិត (ព្យុះព្រះអាទិត្យ) និងអាណ្តាត​ភ្លើងដដ៏ធំមហិមា ហើយថាមពលទាំងនេះ​ហើយ​ជាការរុញច្រាន Voyager 2 ឲ្យមានល្បឿនទៅមុខជាង Voyager 1។

គួរកត់សម្គាល់​បន្ថែមទៀតថា នៅក្នុងអំឡុងពេល​នៃវដ្តន៍ ១១ឆ្នាំ ព្រះអាទិត្យ​តែងតែឈាន​ដល់​ចំណុចមានឥទ្ធិពល​ខ្ពស់បំផុត និងទាបបំផុត។ ដោយឡែក​យាន Voyager 2 ត្រូវបានក្រុម​អ្នកវិទ្យាសាស្ត្រ​រំពឹងថា នឹងឆ្លងចូល​តំបន់ Interstellar នៅរយៈពេលប៉ុន្មាន​ខែខាងមុខនេះ​ទៀត​ប៉ុណ្ណោះ ដើម្បីធ្វើការសិក្សា​អំពីអ្វីៗប្លែកៗជាច្រើន នៃតំបន់ដែលស្ថិត​នៅតំបន់អន្តរ-អវកាស​៕

ចែករំលែក