រ៉ុក្កែតក៏​ផលិតមិនទាន់​ហើយ ប្រព័ន្ធសុវត្ថិភាព​ក៏កំពុងធ្វើ​តេស្ត, ដូច្នេះ​ទើប NASA ពន្យារពេលនាំ​មនុស្សទៅភពអង្គារ​ ដល់ឆ្នាំ២០៤០!

0

 

(អាមេរិក)៖ ថ្មីៗនេះ​ទីភ្នាក់ងារ​អវកាស NASA និង​កងទ័ពអាកាស​អាមេរិក​បានធ្វើ​តេស្ត​ជា​លើកដំបូងនូវ​ ប្រព័ន្ធទ្រទ្រង់ និងថែ​រក្សា​ជីវិត (Survival System) សម្រាប់ពេល​អវកាសយានិក​ ត្រឡប់ចុះ​ពីទីអវកាសមកដល់ផែនដី​វិញ គិតចាប់តាំងតែ​ពីកម្មវិធី Space Shuttles ត្រូវបានបិទ​បញ្ចប់កាលពី​ឆ្នាំ២០១១។ នេះបើតាម​ការដកស្រង់ការផ្សាយ​ចេញពីវែបសាយ Space.com នៅល្ងាចថ្ងៃអង្គារ ទី២៣ ខែតុលា ឆ្នាំ២០១៨។

ការធ្វើតេស្តនេះ គឺជាផ្នែកមួយនៃ​ការត្រៀមរៀបចំ​របស់ NASA សម្រាប់ការបញ្ជូន​មនុស្សឡើងទីអវកាស​ជាលើកទីមួយ តាមរយៈ​យាន​អវកាស Orion របស់ខ្លួន ដែលរចនាឡើង​ដើម្បីនាំយក​អវកាសយានិក ឡើងទៅកាន់​ទីអវកាស​ដែលនៅក្បែរ​ភពយើង ព្រម​ទាំងគោលដៅ​ឆ្ងាយៗដូចជាព្រះច័ន្ទ និងភពអង្គារ (Mars) ជាដើម។

ស្ថានភាពនៃ​ការធ្វើតេស្តខាងលើ ត្រូវបានផ្តោត​ទៅលើប្រព័ន្ធ ដែលមានតួនាទី​ការពារ​អវកាសយានិក ក្នុងការចុះមក​លើដែនសមុទ្រ​នៅក្រោមលក្ខខណ្ឌ​អាកាសធាតុមិន​អំណោយផល។ នាអំឡុង​នៃការធ្វើតេស្ត NASA និងទ័ពអាកាស​អាមេរិក បានសិក្សាទៅលើ​​ឧបករណ៍ពោងអណ្តែត​លើផ្ទៃទឹក ដែលអនុញ្ញាតឲ្យ​​​ក្រុមអវកាសយានិក​ ចាកចេញពីយាន Capsule ព្រមទាំង​ប្រព័ន្ធ​បាញ់​សញ្ញា (Beacon System) ដែលជួយ​ឲ្យក្រុមអ្នកសង្រ្គោះ អាចកំណត់ទីតាំង​ក្រុមអវកាសយានិកបាន។

ការធានាសុវត្ថិភាព​អវកាសយានិក បានក្លាយជារឿង​ចម្បងគេ​បន្ទាប់មានការ​ទទួលបរាជ័យ​ នៃការបាញ់បង្ហោះ​យានរុស្ស៉ី Soyuz កាលពីថ្ងៃទី១១ ខែតុលា ដែលបានធ្វើឲ្យ​អវកាសយានិក​ពីរនាក់ ត្រឡប់ចុះ​មកផែនដីវិញ ក្រោយពី​គ្រាប់​រ៉ុក្កែតរបស់ពួកគេ ត្រូវ​បាញ់​បង្ហោះចេញពីផែនដី​បានប៉ុន្មាននាទី​ប៉ុណ្ណោះ។ ប្រព័ន្ធសុវត្ថិភាព​ដែលផ្តាច់យាន Capsule ចេញពីគ្រាប់រ៉ុក្កែត​មានបញ្ហានោះ មិនធ្លាប់​ត្រូវបានប្រើប្រាស់​ឡើងក្នុងពេល ៣៥ឆ្នាំ ចុង​ក្រោយនេះ។

គួរជម្រាបថា យានអវកាស Orion របស់ NASA ត្រូវបាន​រចនាឡើង​ ដើម្បី​ហោះហើរ​លើ​គ្រាប់រ៉ុក្កែត SLS ដែល NASA ផលិត​មិន​ទាន់​ហើយនោះទេ។ សម្រាប់ការបញ្ជូន​អវកាសយានិកឡើង​ទីអវកាសតាមរយៈយាននេះ ត្រូវគេ​កំណត់ថា នឹងចាប់ផ្តើមនៅដើម​​ទសវត្សរ៍២០២០ ដែលជាហេតុ​ធ្វើឲ្យ NASA មានពេល​វេលាច្រើន ដើម្បីធ្វើការធានា​ប្រព័ន្ធសុវត្ថិភាព​ទាំងអស់ អាចដំណើរការ​​ទៅ​បានជាធម្មតា នៅក្រោមលក្ខខណ្ឌ​មិនអំណោយ​ផលនានា៕

ចែករំលែក