នេះជារូបភាព​ថ្មីក្តៅៗ ដែល​កែវយឺត​អវកាស Spitzer ទើប​ផ្តិតបាន! ចង់ដឹងថាជាអ្វីឬអត់?

0

(អាមេរិក)៖ ទីភ្នាក់ងារ​អវកាស NASA ទើបតែបាន​បញ្ចេញរូបភាពថ្មី​មួយទៀត ដែលថតបាន​ដោយកែវយឺត​អវកាស Spitzer ដែល​​មានបានឆ្លុះ​មើលទៅ​កាឡាក់ស៊ី Milky Way ដើម្បីស្វែងរកតំបន់​បង្កើតផ្កាយ​ឈ្មោះថា Cat’s Paw និងពពុះ​អវកាស​ដ៏ធំ ដែល​វា​កំពុង​​បន្តបំប៉ោង​ឲ្យកាន់តែធំ​ឡើងៗ​។ នេះបើតាម​ការដកស្រង់ការផ្សាយចេញពី​វែបសាយ BGR នៅព្រឹក​ថ្ងៃពុធ ទី២៤ ខែតុលា ឆ្នាំ២០១៨។

តំបន់ Cat’s Paw Nebula មានឈ្មោះ​បែបនេះ គឺដោយសារតែ​រូបរាង​ប៉ោងៗរបស់ ប្រៀបដូចជា​ដានជើងសត្វឆ្មា។ ដុំប៉ោងៗ​ទាំង​នោះ ត្រូវអ្នកវិទ្យាសាស្រ្ត​ជឿជាក់ថា គឺជាឧស្ម័ន​អវកាសដែលកើន​ឡើងកម្តៅ នៅជុំវិញក្រុមផ្កាយទើបកកើតឡើងថ្មី ដែលទិដ្ឋភាព​បែបនេះ គឺងាយនឹងចាប់បាន​ដោយកែវយឺត​អវកាស។

NASA បាន​ធ្វើការ​បកស្រាយថា បន្ទាប់ពីសំណុំឧស្ម័ន និងធូលីអវកាស​នៅក្នុងតំបន់នោះ បានរួមបញ្ចូលគ្នា​បង្កើតចេញពីផ្កាយថ្មីៗ ផ្កាយទាំង​អស់​នោះ​ប្រហែលជាបង្កើន​កម្តៅនៃឧស្ម័ន​​ ដែលរងសម្ពាធនៅ​ជុំវិញពួកវា ហើយ​ជំរុញឲ្យឧស្ម័ននោះ​រីកខ្លួនទៅ​ក្នុងទីអវកាស និង​កើតចេញ​ឡើងដុំពពុះតែម្តង។

គួរជម្រាបថា គែមជិត​បំផុតនៃ Cat’s Paw Nebula ស្ថិតនៅចម្ងាយ​ប្រហែលព ៤,២០០ឆ្នាំពន្លឺ​ពីផែនដី ប៉ុន្តែលាតសន្ធឹង​រហូតដល់​ចម្ងាយ​៥,៥០០ឆ្នាំ​ពន្លឺពីភពរបស់​យើង ខណៈ​កាឡាក់ស៊ី Milky May ត្រូវគេជឿជាក់​មានមុខកាត់ប្រវែងចន្លោះពី​ ១៥០,០០០​ឆ្នាំ​ពន្លឺ​ ទៅ​ ២០០,០០០ឆ្នាំពន្លឺ៕​

ចែករំលែក